الي فارس العرب

الي منتظر الزيدى الذى ضرب بوش بالحذاء فدخل التاريخ من أوسع أبوابه
تحية من القلب أليك يا من زحت الهم عن نفسي
أليك يا من أعدت الكرامة الي بنى وطنى
أليك يا من رفعت رأس كل عربي
أليك يا صاحب الحذاء أقول:
( وما رميت اذ رميت ولكن الله رمي ) تسلم أيديك يازيدى ...... النهارده بصحيح عيدى

أتوبيس الهيئة ابو نص جنيه

بعد انقطاع عدة شهور لاسباب فنية تتعلق بجهاز الكومبيوتر الخاص بي أعود اليوم الي مدونتي الحبيبة بكلمات عن الاتوبيس أتوبيس
الهيئة الذى نعاني فيه الزحام الغير أدمي وخاصة في ساعات الذروة وأليكم أتوبيس الهيئة:

أتوبيس الهيئة ابو نص جنيه

كل الخلق بتجرى عليه

يوماتي باصص في عينيه

معرفش يعني ركبته ليه

.....................

أتوبيس الهيئة أبو نص جنيه

ناس شقيانة بتركب فيه

شايفه الناس من حواليه

مرسيدس لانسر وشيفورليه

والفقير يارب خليله رجليه

معرفش يعنى ركبته ليه

.......................

أتوبيس الهيئة أبو نص جنيه

فيه الموسكي تلقي يابيه

ولاعة للبوتجاز يا محترم هدية

مش ح نقول الولاعة بأربعة جنيه

ولا حنقول الولاعة بتلاتة جنيه

ولا بالخسارة بأتنين جنيه

كل من طلع واحد جنيه

الولاعة حلال عليه

معرفش يعني ركبته ليه

.......................

ف أتوبيس الهيئة أبو نص جنيه

يقولك معايا الرقيه الشرعيه

ومعايا الورد بتاع الصبحيه

وكمان ورد ساعة العصرية

والوهبة بس جنيه

معرفش يعني ركبته ليه

.........................

في أتوبيس الهيئة أبو نص جنيه

يقولك هدية لحماتك يا مواطن

ترضي عنك وتجوزك فاتن

سم فتاك يقضي علي الفيران

وبودرة للصرصار والنمل والدبان

أسمع كلامي وأرجع لها بهدية

.............................

في أتوبيس الهيئة أبو نص جنيه

تلقي الزحمة لحمة في لحمة

واحدة بتحكي عن لجنة السياسات

والتانية بتلعن الفقر والطلبات

وست بترغي والرغي للستات وصلة ورا وصلة وكلها سلامات

لمرات أخوها والعيال ويا البنات

وتقول يا توحه بيني وبينكم تلات محطات

سخني الشوربة وحلة المحشي وجهزى تلات بصلات

والحلو معايا ح أجيبه بلح أمهات

................................

في أتوبيس الهيئة أبو نص جنيه

واحد طالع نازل عامل بيه

بدلة ألاجه وشكله خواجه أبن الايه

خش لجوه وموجة عفيه جابت رجليه

ف وسط الزحمة لقي جميزةمايلة عليه

معلش ياسي الاستاذ قالتها وراحت راكبه عليه

نفسه أتحاش والموت بان جوه عينيه

صرخ سيدنا أفتحوا شباك خلوا النسمة تيجي عليه

واحدة صغيورة حلوة ومطيورة فتحت شنطتها ومنها كلونيا رشوا عليه

فاق الباشا وقال يأخوانا أنا فين ومنين وده ليه!!!

الكمسارى قاله تلات خمسات خط الجيزة والعامرية

جاى معانا ولا ح تنزل جاك خابط يا سعادة البيه

نزل الباشا بعد ما فلفص حافيه رجليه

في الزحمة سرقوا الجزمة وكمان نضارته من علي عينيه

بكي بدموعه ولعن الدنيا ...... وكمان والديه

أتارى الحيلة كان عنده ميعاد لوظيفة أنما أيه

شافوه أتأخر قالوا لامؤخذه ألاخ ما يعتمدش عليه

وأتوبيس الهيئة أبو نص جنيه

معرفش يعني ركبته ليه

الدكتور/ عبدالوهاب المسيرى ضمير وطن

يوم الخميس 3 يوليو 2008 توفى الى رحمة الله د. عبدالوهاب المسيرى صاحب موسوعة (اليهود واليهودية والصهيونية )فى ثمانية اجزاء
أستاذ الادب الانجليزى بجامعة عين شمس ومنسق حركة كفاية... الدكتور المسيرى يرحمه الله كان وطنيا بكل ما فى هذه الكلمة من معانى ولا يخشى فى قول الحق لومة لائم .
يوم أن اشتد عليه المرض لجأ الى مصر ألام والحضن والوطن يطلب العلاج على نفقة الدولة ولم تتم الاستجابة له علما بأنه يتم الاستجابة للكثيرين ممن ليسوا فى مكانة أو قيمة الدكتور المسيرى.
المهم تم علاجه على نفقة بعض الامراء السعوديين وحين قرأت عن ذلك على صفحات الجرائد شعرت بحزن شديد لما لقيه هذا الرجل من
مصر الام والحضن والوطن فكانت هذه الكلمات :-

مصر يامه ليه قسوتك زايده
أبنك ضناكِ بيتلوى وأنتِ ولا فايدة ولا عايدة
قالك داوينى والدوا عندك نظرة وتنهيده
سألك وسؤاله طال والرد ما جاله
أبنك ده عالِم وف دنيا الرجال مشهود له بالقيمة
ليه يا مصر بتهدى الجبال والصِغار فى الحضن تأويهم
ليه يا مصر ولادك بتخزيهم ووقت الشدة ترميهم
ليه الحضن الدافى نلقاه بعيد عن ترابك وعن طينك
المسيرى جبل والجبال ما تنهد بكل أعاصيرك

الست فهيمة أمرأة غلبتها الحياة

الست فهيمة ده جارتنا من زمان
جت لى مرة تشتكى غدر الزمان
عايشه يعنى عيشة صعبة وجوزها كان
راجلها وسندها ومشيلاه وشايل كمان
طلباتها والعيال وأمه وأبوه وحتى الجيران
أن قصدوه فى خدمة أو حكاية دايما يبان
راجل ودايما يقضى المصلحة مهما كان
بعد موتة صبحت وحيدة فى الحياة
لاعم فيه للعيال وقت أزمة تلتقيه
ولا خال يعينها وقت شدة تروح وليه
تشتكى حالها والبنات يرق قلبه وتلاقيه
يروح وييجى ويسعى لما الحل يلاقيه
فهيمة بعد أعلان الوراثة ما طلع وبان
والتركة وزعوها على أبوه وأمه والبنات وهى كمان
قالت بأيه يفيد البكا والمرحوم كان أصله جبان
قلتله ياما يكتب القرشينات بأسمى نبقى فى أمان
قال ده حرام ومات وسبنا نشحت عشانا من الجيران

بأحب الناس

بأحب الناس بيض سود أو حتى قرود

مسلمين مسيحين أو حتى يهود

بأحب التسامح بأحب اللى زارع أرضه وفالح

بأحب الصراحة والصدق مُنجى وراحة

بأحب الورود والعنب عنقود

بأحب الآمانة ولو بطنى جعانة

بأحب الشجاعة ولو ودتنى الزنزانة

بأحب البسمة أحلى من النسمة

بأحب الحياة لو تداوى ألآه

بأحب النهاردة لو زرعت فيه وردة

بأحب الطفولة وفيها البراءة

بأحب الكهولة وفيها الخلاصة

بأحب الآلم وفيه الندم

بأحب الموت بمعنى البداية

بأحب الشمس تدفى البدن

بأحب القمر وهو هلال

بأحب المطر فى يوم الشتا

بأحب المياه ومنها الحياة

قال وقلت (1)

قال: ليه نخلى الخبيث بالتوب الجميل يتزوق
قلت : ياعم صلى ع النبى وقوم روق
قال : ليه الكذب يبقى الحق ونصدق
قلت : دى حكاية الكون من يوم ما أِتخلق
قال :تفتكر فى يوم حنتوفق
قلت : ما يصح أِلا الصحيح وبعونه يتحقق

يا مصر

يا مصر ليه ناسك بقوا وحشين

ولا أنتى اللى وحشة وزى الطين

بناتك للمحزق والملزق بقوا غاويين

وولادك بقوا يعنى لمؤخذة عيال صايعين

ياحلوة ياللى رضعتى وربيتى شبابك فين

سهرتى عليهم ياحلوة من العمر سنين

وكبروا وبقوا حاجة تسر القلب ويا العين

صرفتى عليهم بدل الآلوف ملايين

فى الهندسة والطب وخرجوا وقالوا مش راجعيين

راحوا للعم سام عُلماء وبعلمهم جاهزين

ومنهم ناس لآوروبا قالوا أحنا مهاجرين

صرفتى مالك وزادك ويا زوادك والفايدة للتانيين

عشان ما تنضربش على قفاك

عشان ما تنضربش على قفاك كتاب أصدره أخيرا ضابط الشرطة المتقاعد عمر عفيفى وتم سحبه من الاسواق بالرغم من أنه يشرح للمواطن حقوقه عند التعامل مع الشرطةسواء كان ذلك فى قسم البوليس أو فى الشارع او عند التعرض له فى منزله سواء للتفتيش أو خلافه وحقيقة لا أفهم سببا لمصادرة الكتاب .
الذى أفهمه أذا كان الكتاب يحتوى على معلومات غير صحيحة أو مضللة أن تقوم الداخلية أو جهة مسئولة بتفنيد ما ورد بالكتاب والرد عليه أما المصادرة فليست هى الحل لانها ببساطة جعلت كل الناس ترغب فى حيازة هذا الكتاب للاطلاع على ما ورد فيه .
واذا كان الهدف من الكتاب كما يقول صاحبه أن يعرف كل مواطن ما له من حقوق وما عليه من واجبات أذا لماذا لا تريد الجهات التى سحبت الكتاب للمواطن أن يعرف ؟؟؟

adopt your own virtual pet!

web counter

العمر عدى

العمر عدى ووصلنا سن المعاش

ولسه يا دنيا لينا عمر وما أنتهاش

سنين كتير بنجرى جرى الوحوش

والرزق مكتوب بس أنت ما تعرفوش

تصحى من نومك تقول يارب يارزاق

بارمى حمولى عليك وأسمك الوهاب

تلقى رزقك وجالك على عتبة الباب

××××××××××××××××

العمر عدى ووصلنا سن المعاش

ولسه يا دنيا لينا عمر وما أنتهاش
رزقك فى زوجة صالحة ربنا يعطيك

أ و بُنية حلوة بسمتها تسعدك وترضيك

أو ولد راجل عليه تتسند ويبقى عكازك

××××××××××××××××××

العمر عدى ووصلنا سن المعاش

ولسه يادنيا لينا عُمر وما أنتهاش

أصحابك فين الدنيا واخداهم

أسأل واعرف أيه اللى جرى معاهم

شوف زيد ان كان عيان روح زوره

وعبيد ان كان محتاج روح وأديله

××××××××××××××××

العمر عدى ووصلنا سن المعاش

ولسه يادنيا لينا عُمر وما أنتهاش

الصحة بقت شيكا بيكا وماشى الحال

الرماتيزم واجعلى مفاصلى وبقى عندى هُذال

والكحة يعنى ملازمانى والست أم العيال

×××××××××××××××××××

يازمن دوار مالكشى صاحب ولا خال

ليه مكشر فى وشى والضحكة كانت ما بينا سجال

علشان بقيت معاش وانت لسه شغال

بكرة يرزقنى المولى بوظيفة تانى عال العال

وترجع تقوللى ياعبده باشا ميت مسا وكيف الحال

×××××××

العمر عدى ووصلنا سن المعاش

ولسه يا دنيا لينا عمر وما أنتهاش

يوماتى حأصحى وأقول بأحمدك أنا عايش

وزى ما بأعبدك لازم تكون بصمتى مادام عايش

لو كل يوم زرعت أنا وردة يبقى أنا عايش

لو كل يوم علّمت أنا حرف يبقى أنا عايش

لو كل يوم مسحت أنا دِمعة يبقى أنا عايش

لو كل يوم عرفت أنا معلومة يبقى أنا عايش

والعمر عدى ووصلنا سن المعاش

ولسه يادنيا لينا عُمر وما أنتهاش

سنية فى طابور العيش

فيما مضى من الآيام كان طابور الخبز أمام ألافران من سمات الحياة اليومية فى مصر ثم اختفت هذه الطوابير لفترة أو بتعبير أدق اصبحت أقل فى الازدحام ... ولكن هذه الايام عادت من جديد وأصبح المواطن يعانى يوميا من الصراع فى طابور العيش من أجل الحصول على القليل من الارغفة لتسد رمقه واولاده وليعاود الكرة فى اليوم التالى ليحصل على رغيف العيش لكى يعيش ومن
هنا من هذه المعاناة كانت الكلمات الاتية :-

فهيمة قامت ... من نومهالاقت ... سلفتها سابت ... فرشتها من بدرى

فهيمة قالت ... سنية راحت ... لفرن ثابت ... يارب يا منجى

خمس ساعات ... والوقت فات ... حتى البنات ... صرخوا أه ياخالتى

فهيمة بعتت ... مرسال ووصت ... يروح يتبت ... أيه اللى جارى

مرسالها راجع... وقلبه والع ... وقال يا جامع ... لطفك ياربى

الست واقفة ... فى ايدها ماسكة ... قفص وناوية .. دورها لو يجى

تاخد عيشها ... وترجع لبيتها... تأكل راجلها ... وع الرزق يجرى

المولى شاء ... يجيها القضاء ... والسكته داء ... ينهى عمرك وعمرى

سنية ماتت ... وشهيدة كانت ... للعيش وسابت ... بنت وولد بيحبى

الهانم ساقت عربية

فى شهر ابريل من عام 2007 تم شراء سيارة للسيدة حرمنا لتتعلم عليها القيادة وبالاحتكاك اليومى بهذه السيارة كان الانفعال وكتابة هذه الكلمات مع الاعتذار لحرمنا المصون ولمشترى هذه السيارة.....





الهانم ساقت عربية
انتيكا يعنى وشضليه
تشوفها ساعة العصرية

ماشيه ورايحه الحلمية
تقولك توصيلة لحد السبتيه
تحلف بكل عزيزة وغالية
ماأركبشى اليوم غير رجليه

الهانم ساقت عربية
انتيكا يعنى وشضليه
ف الوش مضروبة ببشله
وعينها دايما ... مكسورة
وأن زاد الحمل ... عليها
تبكى وتصرخ ... وتلالى


الهانم ساقت ... عربية
أنتيكا يعنى ... وشضلية
مرة تجرى كما الغزلان
ومرة تحرن وتبقى خبلان
أن جاعت أكلتها بتنجان
وأن عطشت ترويها بحب الرمان


الهانم ساقت ... عربيه
أنتيكا يعنى ... وشضلية
كل الخلق تشوفها وتضرب بوز
من خلقتها اللى فى شكل عجوز
وتقولك وديها لعمك عزوز
دى الرحمة ياأفندى عليها تجوز
وأقرأ الفاتحة يمكن بالجنة تفوز


الهانم ساقت ... عربية
أنتيكا يعنى ... وشضلية
تديها الآول تصرخ وتزمجر
تديها التانى تتبغدد وتشخر
وأن حبيت تديها مارشدير
احسنلك تقول زقة يا أهل الخير

حديث أم قرأن كريم

فى خلال الايام القليلة الماضية ذهبت الى احد معامل التحاليل بمصرالجديدة لاستلام نتيجة التحليل الخاص بزوجتى وأنا هناك حضر شخص ودخل مباشرة الى مكتب المدير المسئول بالمعمل والقى السلام يصوت عال وهو يقول:

السلام عليكم ورحمة الله ( أذا حييتم بتحية فحيوا بأحسن منها او ردوها الكلام ده قرأن ولا حديث ) وكان يوجه حديثه لآشخاص اخرين داخل المكتب ولكنى كنت اسمع صوته وانا خارج المكتب، ويبدو أنة بعد أن القى السلام لم يسمع ردا ولذلك كان سؤاله السابق موجها لهم .

بعد دقائق دخلت المكتب لآستلام نتيجة التحليل فبادرنى بسؤلى ليك فى الدين ؟ فقلت لست متعمقا بدرجة كافيه فقال موجها سؤاله لى( اذا حييتم بتحية فحيوا بأحسن منها أو ردوها ... هل هذا قران ام حديث ؟؟

وكانت اجابتى اعتقد انه حديث وليس قرأنا ... فأعاد توجيه السؤال الى بعض العاملات فى المعمل ومن الزى يتضح انهن مسلمات

لآرتدائهن الحجاب وكان الرد أن هذا حديث وليس قران ... فعلق على ذلك بأنه لا يريد ان يقول انه على يقين ولكنه يعتقد أن هذا قران فأقترحت عليه احدى العاملات لديه ان يتصل بدار الافتاء على رقم 107 وفعلا تم ذلك ولكن متلقى الاتصال لم يتمكن من أعطائنا الرد الصحيح

بل اعتقد ان المطلوب فتوى فأكد له الدكتور أنه مجرد سؤال وليس فتوى فاجاب عليه بانه سيحيل الامرالى المختصين.

استلمت نتيجة التحليل وعدت الى منزلى وبحثت فى كتاب رياض الصالحين وعرفت انى كنت على خطأ وان الدكتورفكرى المسيحى المصرى المثقف كان على صواب وبقدرما شعرت بالخجل من نفسى بقدر ما شعرت بالآحترام تجاه هذا الرجل (واذا حييتم بتحيه فحيوا بأحسن منها أو ردوها قرأن الآية 86 من سورة النساء

ولذا فأننى من هنا أحى الدكتور فكرى الآنسان المثقف المسيحى المصرى الذى يضطلع على ثقافة الاخر وديانته بلا أى حساسيه دكتور فكرى تحياتى واحترامى......

من انا

اسمى راضى ..وطبعى هادى..وشكلى عادى.. ليسانس عندى.. فى اليونانى

واحلى عمرى.. عايشة يعنى ..بعد معاشى ..زوج وزوجتى.. ماليه حياتى

بس يعنى.. خلفة مافى.. وراضى بحالى

مصر بلدى.. والاسلام ديانتى..والانسان حكايتى.. ونكدى يعنى.. لو يعانى.. عاديه عيلتى.. ومستوره عيشتى.. بأحب امى .. وهى قلبى.. ونور عيونى

باحب بيرم.. ولقبه تونسى ..وهو صاحبى.. عمره ماشافنى.. ولا شفته يعنى

بس التقينا.. والزجل حبينا

عندى صحابى.. واحلى وقتى.. لما بأحكى ..مع رفاقى.. بالنت بأقضى احلى ساعاتى.. بشوف يوماتى.. موقع وتانى.. ونفسى بلوجى .. يبقى حياتى ..عليه كلامى.. وكمان أرائى

مانيش سياسى.. ولا بعشق كراسى.. ولحزب السلطة مش ناوى .. انضم

ولا أنا غاوى

امريكا والعراق

هس اسكت واسمعنى ياويكا
فيه موقع عالنت تبع البولوتيكا
اسمهWWW.نصب وشيكابيكا.COM

هس اسكت واسمعنى ياويكا
فيه موقع عالنت تبع البولوتيكا
فى الموقع شفت انا خبر انما انتيكا
قال ايه واحد هجمه وزى الحيطة
فى ايده مدفع وقلبه مولع جاى يحرر عراقيكا